دلی بهلول
بيرينجي پرده :صحنه بير بويوك سنتي بازاردربهلول آغاجي آت ائلييب مينيب ،بير نچه نفرده اونونلا قاچير .بير طرفدن ده خليفه هارون الرشيد آداملاريلا برابر گلير بيردن بهلول خليفه ني گورن كيمي دايانير آغاجي آتير يئره و وورماغا باشلير .
بهلول : سنه من دئمه ميشم يئريني تاني ، آياغيني يورغانيندان آرتيق چيخارتما........
بهلولون يولداشلاريندان بيري: آي بهلول ، ييغيش خليفه مسجده گئدير ، قالخ اونون يولوندان ....
بهلول : آخي بئله روزگار اولار منيم آتيم آجيندان قورويوب آغاج اولور خليفه نين آتلاري سارايين اوتلاقلاريندا .....قالخ حيوان سنده خالقا باخ اوتانما ، سنين احوالاتين اونلارين احوالاتيلا ائله بير گلر . آخي بوراباخ سنده اونلار كيمي اكيب بيچيرسن ،آغير وئرگي وئريرسن ،حسرت يييرسن......يوخ سن گره ك حسرت يئمييه سن .شادليقينا شيللاق آتيرسان ...قشوولانما ...من خليفه دئييلم كي سنده وزير اولاسان. سنينله منيم زيغيميز كوپوكلو سودان يوغرولوب .
وزير : قوربان آبدال بهلولون آتي اولوب ،قالخمير،اونابير كيسه پول وئر اوت آلسين آتينا وئرسين بلكه آتي ديريلسين .(هامي گولور)
خليفه : آي بهلول نه اولوب نييه بئله غضبلي آتيين وورورسان؟
بهلول : قوربان رعيت آجليقيندان قودروب بس منيم آتيم نييه گره ك اونلاردان درس آلسين . باخ بو حيوان درس آلاندير بير ياخشي حيواندان درس آلسين ....گل بو بيزيم وزير ..قشوولانسادا اونون كيمي ادبلي قشوولانسين ،باخ بو آتلار بونا باخير پيس اويره نير . توتاق كي بوگون خليفه خالقا خوش باخير آهي اوندا بس يازيق وزير نئيله سين ، سارايين باشقا بالا ييغيشان ميلچكلري نئيله سين ؟واي من نه دانيشديم ؟..ايندي ميلچكلرين ملكه سي گليب منيم ديليمي بوينومدان چيخاردار .
ملكه :دلي بهلول نئجه سن سنه بير ياخشي قيز تاپاق ؟
بهلول : آخي بورا باخ گوروم قيز ، قيز اولسا نييه ملكه اولوب ساريدا وزير وكيلين گويلون گورور يا منيم كيمي بوش بئيين خليفه يه بئل باغلير كي آغليم گوبه ييمدن آشاغي ايشلير ؟
ملكه : دوغرودان دا ديوانه سن سنين آغلين اولسايدي .....
بهلول : دوغرودور ...اولسايدي ...آمما نئيلييم ...منده ايستيرديم سارايين باش وزيري اولوم ..و سنين كيمي ملكه يه .....
خليفه : كس سسيني آلچاقين بيري سي آلچاق ...سن آخير بوينو منيم غضب قيلينجيما باغيشليياجاقسان .
بهلول : منيم بوينوم ائله بير آرمود ساپي دير قوربان. گورورم خليفه يه ايپ لازيمدير چونكي رعيتين هاميسي خليفه نين دولتيندن ، آجلاريندان ،منيم كيمي ، خليفه يه ايپ حاضيرلاييرلار داها قيلينجا نه گره كدير وئرگيلري چوخارتماقلا ايپلر هاميسي قيريلماقدادير .(بير آريق كيشي خالقين ايچيندن سسله نير )
كيشي : يا اميرالمومنين ، اوشاقلاريم آجدير ، آرواديم خسته دير ،داوا درمان لازيمدير ،كومك ائيله بلكه...
وزير : سارساق سن هميشه ديله نيرسن بو سنين كوهنه كسبيندير ..ايتيل .(اونو وورور)
بهلول : (كيشي نين بوينوندان ياپيشير) بس هاني سنسن بويوندوروغون ؟مگر خليفه نين گوستريشيله ، وزير سيزي داغلييب ناللامييب ؟ گئت قاريش ناخيرا ناخيرچينين واختيني توتما .
خليفه : ديوانه من گره ك سنين آغزيني باغلييام ، قيفيللييام .
بهلول : آللاه خليفه نين سايه سين بيزم باشيميزدان كسمه سين، نييه كي اوندا بولودلار ياغار ياغيشي سئل اولوب بيزي آپارار .
وزير : سن نه هورورسن ، آغزيني آچيبسان قارانليقا .
بهلول : ايشيقي سوندوروبسوز دا ، چكيلين قوي آيدينليقا هوروم .يوخ هورمگه ايمكان يوخ ..ايت اليندن سوموك گميرمك اولمور .(بهلولولون دليلري هورمه يه باشلير و ملكه نين دوورون آليرلار )
ملكه : ايتيلين نه ايستيسيز ؟
خليفه : كسين سسيزي نه آلچاق يونگول ايشلر گوروسوز . بو دلي دن بوندان آرتيق اويره نمزسيزكي .
بهلول : قاييدين منيم دوسلاريم او سورونون چوبانينين ديشلري چوخ بركدير ايتلري دورون آليب سيزه بير شيء قالماز ، قاچين اوزاقلاشين .
خليفه : ايتيلين سارساقلار،آبداللار..(بو حالدا بير قادين يامان احوالاتلا، آغلار ،اؤزونو خليفه نين آياقي آلتينا آتير و هونكورتو ايله آغلير )بو كيم ؟
وزير : قالخ اوزاقلاش بوردان .بو نه هاي كويدير ؟ اميرالمومنينين واختيني توتما .ابو حنيفه عاليمين مكتبيندن گوروش ائده جك .
خليفه : نه اولوب ؟ سنه نه ظولوم و فلاكت باش وئريب ؟
قادين :يا اميرالمومنين اليم اتييوه . يوخسول بير دول آروادام .اريم نئچه ايلدير عومرونو وئريب ....
خليفه : ياخشي بو بير درد دئييل كي علاجي اولميا.منيم حاكميتيمده قادينلاري قوروماق اوچون دينيميز ياخشي يوللار قويوب . سن گره ك بير مسلمانلا ائولنه سن .سنه يالنيز قالماق جاييز دئييل .استغفرالله .
وزير : (خليفه نين قولاغينا)اميرالمومنين ...قوربان ...آخي ....
خليفه : نه دانيشيرسان ؟اوجادان دانيش قوي ائشيديم .
بهلول: آدامسان ادبلي دانشيرسان؟سسين آت باشينا بركدن آنقير قوي ناخيردا سسين بيللنسين.
وزير : قوربان آخي بو قادين بير قوجا كافتار ، جامالدان يوخسول .توكولموش بير حالدا ،اوندان باشقا قوربان سيزين حرمخانه ده آخي يئر ...يوخدو بئله بير قادينا .
خليفه : منه يوخ كي ،من نئيليرم رعيتي ؟ شاهزاده قيزي دئييل كي باشدان ائله بير باشقاسيلا يولا سال .بيزيم عدالت ،مرحمتيميزي گوستر .
قادين : يا اميرالمونين منيم درديم باشقادير ، سيز نه سويليرسز ، اوجادان دانيشين .
بهلول : آي يازيق سن نيليرسن اوجادان دانيشماغي . سنه نه يارار ..سنين باشيندان او قده ر بو حاكمييتين توخماغي دييب كي آغلين باشيندا قالماييب ، پوكه ليب . و بونلاريندا ازلدن باشلاريندا آغيللاري يوخويدو كي باشا دوشسئنلر .
خليفه : اوزاقلاش ...گئت ائوينه . دئديم وزير هر شيءيي قايداسينا سالار .
وزير : ياخشي عبدالاحسانين اوچ آروادي وار بودا اوستونه ،اولسون دورد .نه اولاجاق . ياخشي ياديما دوشدو ، گئدرسن قاضينين يانينا و دييرسن سنله عبدالاحسانين كبينين كسسين .
بهلول : آي يازيق هاله سن اؤز احوالاتينا آغليرسان منده سنين بو چتين يولدان دوز مقصده چاتماغينا هئچ اينانيم يوخ .قويونو قوردا تاپشيرديلار .آي يازيق سن نه دييجه كسن قاضييا .كئچي جان هاييندادير ، قصاب پي آختارير سني گورن همي .....
قادين : اي يازيق جانيم منيم باشيمين بوتون بلالاري ائله قاضي دن دير .
وزير :سن بوش يئره سوسهلنيرسن . نئجه قاضي دن سنين شيكايتين اولا بيلر.
قادين : يا اميرالمومنين يارديمن ائله ائولادلاريم، كنديم ،محو اولوروق منيم قاضي دن شيكايتيم وار .او...
بهلول : قاضي نين گوزو خالقين يا ماليندادير يا ناموسوندا ، او نئجه .....
وزير : ديوانه وآبدال بهلول سن كس سسيني ، قوي آرا ساكيتلشسين گوره ك خالقين دردي ندير .؟
قادين : او منيم حياتيمي ايشيقين سوندوروب ، قارا گونلره ساليب ...واي تانريم بو نه بلادير .قاضي حامي اولماليدير نه سويقونچو.يا اميرالمومنين يارديم ائت ...
وزير : ايندي واخت يوخدور سونرا گليب سارايدا شو درديني سويلرسن .
بهلول : ائشيت اينانما ، كنديني بوش يئره آلداتما . آي يازيق آدامسيز.كيمسه سيز.
خليفه : آبدال بهلول سن يارديم ائله ،آتيني چاپدير اونون خاراباسينا باش وور آرتيق اسكيييني يولا ،سونرا .نه بليم بلكه آلمالييق ،يوخسا يارديم ائتملي ...نه بيليم .
بهلول : (آتيني وورور آياقلير)من سنه دئمه ميشم خليفه نين آتلارينا قيسقانجيليق ائلمه ، تويوق كيمي ياتيب يوخودا داري گورمه ، آخي سن هارا خليفه نين آتلاري هارا ..هله شيكايتده ائديرسن ...سن قانميرسان كي اورا سارايديرو اونلار خليفه ، وزير ،وكيل آتلاري .اونلاردان مگر آرتيق قالار سنده ييه سن ؟....... هله شيكايتده ائديرسن ؟ سنين نه حاققين خليفه نين قارشينا چيخماغا و كنديندن دانيشماغا ؟..........سن آجيندان اؤلمه ليسن .
خليفه : آز وور آتي ،يازيق دير دلي بهلول ...قاضييه شيكايت ائده ر ها .
بهلول : آنلاماز .اونون نه حاققي وار قاضي ني گورمه يه ؟ كنديني نه سانير بويوندوروغ آختارير ؟ بيلمم آمما يوخ اياقلاريني كسه رم ...گوزلرينه اوت سالا رام .
وزير : آخماقلاما كيشي ... سن نه سوسهلنيرسن ؟معركه قويوب خالقي باشينا ييغيرسان ؟بونلارين عوضينه گئت ابوحنيفه عاليمدن بير ،ايكي كليمه سوز اويره ن .
بهلول : آخي مني مكتبه قويماز ...او بويوك عاليم دير ...بير سيرادا باشيني سينديرميشام .
خليفه : من دييرم سني قبول ائده .
بهلول : ائله اولورسا من گئتملي اولدوم ...آتيم دور گئده ك ...آي يازيق او دليله نييه چارپيشاق ..(قادينا) قادين دئمه دين خليفه يه سنه نه ظولوم باش وئرميشدي ؟
قادين : قاضي منيم بير كوپه قيزيليمي يئييب .امانت وئرميشم خيانت ائديب .
خليفه بو ايشي منيم قاضيم گوروب ؟ قاضي خيانت ائديب ؟
وزير : تهمتدير ....يالاندير .قوربان بو بهتانلار قاضييه ياپيشماز ...
بهلول : دوغرودور ...يازيق قاضي بير كوپه قيزيلي تك يييه بيلمز مگر او آدام ييجي ييب او قده ر اشتهاسي اولا ؟....اوره يي پاسلانار...دوشونده قالار...بس سارايداكيلارين حاققي؟ ...
(آرادان بير غريبه كيشي(تاجير ) باغيرير چاره سيز حالدا قاضي ني آختارير)
تاجير : قاضي هاردادير ؟منه سويله يين .قوي مني بو تله ده ن چيخارتسين ، يا اميرالمومنين الله سيزين كولگه ني بيزيم باشيميزدان كسمه سين ...
بهلول : ائله كولگه ده قايبسان بو قده ر قيب قيرميزي قيزاريبسان ...يا قارني آچيقلارين ديليندن دانيشيرسان ؟ قارني آچيقلارا باخ گور نه قده ر كولگه ده قاليب رنگلري سولوبدور .
تاجير :اشي سن كيمسن ؟ دانيشماغا سوز تاپدين ،واخت تاپدين .
وزير قوربان سيز بويورون من بونلاري يولا ساللام (خليفه ايله ملكه گئديرلر)
تاجير : يارديم ائله يين قريبم .قريب دياردان گلميشم كيمسه م يوخدور .
بهلول: سنده خوش گلدين . قاريش سورويه .
تاجير : اشي سن نه دانيشيرسان ؟....من..كئچن ايل بير كاروانسرادا اوتراق ائله ديم .كاروانسراچي منه بير تويوق ،نئچه يومورتا حاضيرلادي .كاروانيميز يولا دوشدو كاروانساراچيني تاپا بيلمه ديم كي پولون وئريم ...ايندي گلميشم اونلارين پاراسيني وئره م مندن مين دينار ايستير ..آخي بير تويوق ، نئچه پيشميش يومورتانين باهاسي بو قده راولارمي ؟
بهلول : آي يازيق بو اولكه ده هر نه باهادير يالنيز اينسان اوجوزدور،ايستير سن سنه چوخ اوجوز اينسانلار گوستريم ..بونلار هئچ ....واي منيم واختيم كئچدي ،من گره ك بونلاري يئرينه آپارام (بير كيسه جيبندن گوسترير) اينسانين نه قده ر يوكو آز اولسا او قده ر ياخشي دير.(قاچيب اتين مينير دوسلاريلا گئدير).
(هامي داغيلير يالنيز تاجيرله آغلار قادين قاليرلار)
تاجير : بس من باشيما نه داش ساليم بو قريب يئرده ؟
قادين :من ائوي ييخيلميش درديمي كيمه دئييم ؟(بير قوجا حجره سيندن آنلينين تريني سيله سيله اونلارا ساري گلير)
قوجا :آي يازيق سيز كيمدن يارديم ايستيرسيز؟....سيز دلي بهلولو گوردوز؟
قادين : هه من گوردوم او يازيق بير دلي ،آوارا بيراينساندير ...ائوي ائشييي يوخ....
تاجير : ائله بو دونيادا دلي اولماساندا بو آغير دوروملار آدامي دلي ائده ر .
قوجا : سيزين دردينيزين چاره سي اوندادير ....سيز اونو گورمه لي سيز .
تاجير : دليدن بيز نه اومود گوزلييك ؟
قادين : من اونون آديني ائشيتميشم .من گئتديم بلكه بير چاره ....(چيخير)
تاجير : (اونون داليجا چيخير )دايان منده گليم ...منه ده بهلولون ائويني گوستر.....
( ايكينجي پرده )
خليفه نين ساراييدير ، خليفه هارون الرشيد اوتوروب و ايكي نديمه سي اونون باشي اوسته اونو يئلليرلر، خليفه هوسله خديجه آدلي نديمه سينه باخير، خديجه آرالانير و منيره ني قاپي آغزيندا گورور گئدير اونون يانينا.
خليفه : آي قيز بوينومو اوو ، يامان يورولموشام . بو خالقين ايشي عذابي نه زامان مندن ال گوتوره جك ؟
خديجه : (ياواشجا منيره يه )او زامان كي سن اؤله سن اونلارين عذابلاري سندن آسيليدير .
منيره :(ياواشجا)آخي سنين واختين وارخالقادايئتيشه سن ؟(بو حالدا وزير گلير و نديمه لر اونا باش ايير ) ياخشي گلدين وزير اميرالمومنين يورولوب بير آز ايلنمك ايستير .
وزير : ياخشي ،مگر من دلخه يم .(خليفه يه احترام ائدير )
خليفه :وزير دوروم نئجه دير ؟ خالقين ايشي نه يئرده ؟
وزير : قوربان بويوردوغوز كيمي وئرگيلري چوخالتديق ، سارايين تزييناتي اوچون خزانه دن پول گوتووب سارايي سيز سئون كيمي بزه ديك . شيكايت ائدنلري ، حاقلي اولانلاري حاقلارينا يئتيرديك ، هامي راضيدير ، هامي اميرالمومنينين جانينا دوعا ائديرلر اؤزلريني سيزين حاكمييتده ياشاماقلا خوشبخت سانيرلار .
خليفه : وزير او قادين نه اولدو ؟ اونون درديني ائشيددين ؟ اونا بير يولداش تاپدين ؟
وزير : قوزبان ائله بيل كي سايه نيزده ميليونلار اينسان ياشايير. سيزين پارلاق حاكيمييتيزين ايشيقيندان كيمسه قارانليقدا قالماز .
خليفه : ياخشي ، بيزيم دلي آبدال بهلولوموز هاردادير ، چاغيرين بير بيزي گولدورسون .
وزير : قوربان اذن وئرين بهلول بورا گلمه سين اونون باشي قالاباليق دير خالقين ايچينده خالقا ايلنجه قورور خالقي گولدورور ،آغلين لاپ الدن وئريب گورمه دين خالقين ايچينده نه سوزلر دلانيشيردي ؟بيزي لاپ بي آبير ائديردي ، آنلامير نه دانيشير ،آغدان قارادان آغزينا نه گلير دانيشير .ائله بيل ناخيرا غريبه حيوان دوشوب اونا بونا بورنوز آتير .
منيره : وزير بو سارايدا بيزده ايلنمك ايستيريك ياخشي اولار بهلولو چاغيراسان .
خديجه : (ياواشجا) ياخشي اولاربونلاري بي آبيرائده ر.اوايله كيشي لييه لاييقدير،بهلول سئوملي اينساندير.
خليفه : ( شراب ايچير و سر خوش حالدا ) بهلولون سوسهليغينين ساغليغينا ، گل منيم گوزل منيره م ...گل او گوزل گوزلرينله شيرين سوزلرينله ،جيران باخيشلارينلا ، غنچه دوداقلارينلا مني سئويندير ، يانيمدان اوزاقلاشما . منم آيريليقا طاقتيم يوخدو... گل ..گل ...گل مني باغرينا باس (سرخوش حالدا آز قالير ييخيلا كي وزير اون توتوب اوتوتماغا چاليشير )
وزير : آماندير اميرالمومنين اوزونه گل ، اوتور هر نه ايسترسن حاضيردير ....
خليفه : بير دايان گوروم بس منيم باشقا سئوگيلي لريم هارداديرلار . چاغير ...چاغير گلسينلر .(نديمه لر چيخير لار خديجه ايستير چيخا خليفه اونو چاغيرير) گئتمه ...سن گئتمه ماراليم جيران كيمي بوينو اييب باخما ياخين گل ماراليم ..گل مني دينله ...گل مني آرام ائت قوللاريين سال بوينوما سنين قوينوندا دينجلمك منه نئشه وئرير . سئوينج وئرير ...گل ...گل (گوزلريني باغلير )گل ......بو نه ......اولميا من......واي من اوچورام ......گوللري وئر منه ...سن اؤزون گولسن .....گئتمه ....منيده آپار منيم ماراليم ......دايان منده گليم ...
خديجه : دلقك ايستير گولمه يه ...بو كي اؤزو دلقكدير ...گور كيم بو خالقا حاكيم دير ..تانريا آمان .
منيره : بس نئجه ، خليفه نين دلقك ليقي مين ده نه بهلولا ده ير ....بو ياخشي دلقكدير .
وزير : سيزه دئمه ميشديم يمن اوزومونون شرابيني اونا وئرمه يين بلكه اونون قوناغي اولاردي . گوتورون اوداسينا ايستراحت ائتسين (اؤزو شرابي ايچير ) ان اعلا.....دوغروداندا جنتي گوزه گوسترير . باخ ايچه سن بئله بير شراب بوتون دونياني اونوداسان ....بير آن سرخوش ياشاماق بيرعومرقورخودا يالتاقليقدا ياشاماقا ده ير .
منيره : آي بالام بو سارايين ساغلام آدامي دا وارمي ؟
خديجه : بيري بايلدي ياتدي ..گل بويول بونو آپار ، ايشيميز اولوب سرخوش داشيماق ...واي او ميللتين حالينا كي بئله حوكمدارلاري وار بئله ميللت ..(قاضي داخل اولور ، وزير سرخوش حالدا قيزلارا هجوم ائدير ،قيزلار قاچيرلار).
قاضي : منيم دوستوم سنه نه اولوب ؟نييه بئله پريشان سان ؟ دايان .......
وزير : آي يازيق هوشيارليقدا نه وار؟ گوريدين سحر تئزذه سنين دالينجا نه لر دانيشيرديلار ؟ هر كيمي دينديريردين سني پيسليردي ...سنين چيركين عمللريندن دانيشيردي .
قاضي : بو نه سوزدور وزير من بو حاكيمييتين قاضي سيام سيز نه دن اذن وئريرسيز كي مني پيسلييه لر مني بي آبير ائده لر ..بس دئييل بهلولون طعنه لري ...بس دئييل قوجا كافتار قادينين تهمتي ؟
وزير : اميرالمومنين خسته دير يمن شرابي اونو سيراب ائديب اوداسيندا اولاراق ايندي جنتده بير قوش كيمي اوچماقدادير .... منده ائله اولماق ايستيرم ..باخ ..بودا دلي بهلولون بوش سوزلرينين آجي طعنه لرينين ساغليغينا ( شرابي ايچير ) .
قاضي : اوزاق دور گوروم بير، نه دن خالقي ييغيب سيز باشيزا مني بي آبير ائديرسيز ؟
وزير : آبير ...آبير بير ائله سنده ايكينجي سي ده قالسا منده ......آبير نه دير ؟...گل ...گل اوچاق باغداددان موغان چوللرينه اوردان اوچاق قاراباغ يايلاقلارينا گل مني يالنيز بوراخما.گل منه قوشول ...
گور نه گوزل صفالي باغلاري وار اوجا داغلاري وار .
قاضي : وزير ، آييل اؤزونه گل آييبدير ..ياخشي دئييل خليفه نين سارايندا سرخوش دولاشماق ، خليفه بيلسه ......
وزير : نگران اولماخليفه نين حالي مندن ياخشي دئييل ،اودا اوچماقداديرافسوس كي سنه او جنت ميوه سي ، يمن شرابيندان قالمادي ..نئيله مك گوناه اؤزونده دير تئز گلسيدين منيم يول بيراولاردين سفره چيخاردين خليفه نين حرمخانه سينين قيزلاريندان گتير بير خوش اولاق .
قاضي : جناب وزير بو نه سوزذور دانيشيرسان؟....دوغرودان سن آغليني الدن وئريبسن ....
وزير : نه اولار بو دونيادا بيزده بير خليفه وزيري اولماقلا هليفه نين ميوه لريندن اوغورلوياق ..نئجه دير سنين خوشونا گلمير ؟.. اولميا ايستيرسن داناسن خديجه نين سئومه گيني ؟
قاضي : اونون آديني چكمه ....مني بو سارايا چكن يالنيز اودور ..حاضيرام دونيادا هر نه ييم وار وئرم اونا .....افسوس كي او هئچ منه اؤز وئرمير .
وزير : خديجه ....او يامان آفتدير . دوشن جانا ، روحا اوت سالير .آمما يوخ من بو سارايدا خليفه سئچن ميوه لردن سرخوش اولامام ....من قورخورام ....وزيرليكدن دؤشمكدن ...خليفه نين غضبيندن ...عاييله مين محو اولماسيندان .خليفه چوخ كينلي بير اينساندير .اونا اينسان دئمك اولارمي ؟
قاضي : دوغرودور ..گومه دين آل برمك احوالاتيني ؟ ...برمكين دارا چكيلمه سيني ؟
(خديجه گيزلي ايچري گيرير و خليفه نين تختينين يانيندان يايليغين گوتورور ، چيخماق ايستير كي وزير اونو گورورو سر خوش بيرحالدا اونو سوزور )
وزير : من جنتده يم ..بودا ملك ..گئتمه مني ده اؤزونله آپار....مني يالقوز قويما آماندير ...دايان...
قاضي : قورخ خليفه نين غضبيندن ...سن نه دانيشيرسان ...جنت نه دير .ملك كيمدير ؟...بو خديجه دير .
خديجه : قاضي بو معركه ني سن قورموسان ؟ يوخسا معركه ييغماق ايستيرسن ؟
قاضي : آماندير وزير قالخ بوراني ترك ائده ك ....
خديجه : آمان .زاماني آز قالير، خليفه نين اويانماق واختي دير ....معركه بئله يئريسه اينانين هر شي كوتو اولاجاق ....حرمخانه نين قيزلاري نه زامان دير سيزي سوزورلر .. اگر بيري سيزين دانيشيغيزي خبر وئرسه اؤزوز ياخشي بيليرسيز سونو نه اولار .
قاضي : خديجه ، منيم ملييم نه اولور بير آز دايان ...منه يارديم ائت بونو بوردان گوتوره ك.
وزير : مني يوخ اؤزونو سارايدان آييرسين ..داها سن گلدين بونون گئتمگي قالدي آللاها ...مني نه تئز بوراخدين .سني گوردويو زامان اسكي دوستونو انوددو .
قاضي : جناب وزير بو نه سوزدور ؟ من سيزه خاطيرخانيمدان يارديم ايستيرم
وزير : او ملكي آلداتما .. منه سويله ديين سوزلردن سوز آچ ، منده او قده ر سر خوش دئييلديم كي ائشيتمييم ...سن اونو ..او ملكي ..بو سارايين جيرانيني ..
قاضي : بس سن ؟..ائله مي؟...ائشيددين مي ؟
خديجه : قاضي اونو اوزاخلات يوخسا خليفه نين آتش غضبي بيزيده يانديرار .
قاضي : اينان ملييم . منده آيريلماق ايسته مير م .....افسوس كي يانان شعله نين پروانه سي لادير ...سني گورنده......ديلي باغلانير ...بيرده آخي من بو مقامدا سندن سوز آچماغا جسارتيم يوخدور... جسارتيم اولسايدي سويلرديم ..بوتون وجودوملا سني ....
وزير : ديلين باغلانماسين ، سويلسنده ديليني كوكوندن قوپارديب لال ائدرلر . سنين نه حاقين ، نه گوجون ،نه جسارتين اولا بيلر ....چونكي سن ويله ديين سوزدن قان قوخوسو گلير ...
خدجه : اوزاقلاشين ،من گره ك خليفه نين يانينا گئده م ..اونون ايندي واختي دير كي اويانسين من اولماسام....(چيخير ).
قاضي : بس من ...من آخي خديجه سيز ياشييا بيلمرم .
وزير : ائله بيل سنين باشين بدنه آغيرليق ائدير ..يازيق ، سن خليفه ني تانيميرسان بو سوزلري آغزيوا گتيريرسن ؟....آل برمكين احوالاتيني يادا سالاندا بوتون دونيا اينسانين گوزلرينده قارالير اوندا فالميش سئوگي ، سئويلمك .
قاضي : اونون كيمي ملكي من نئجه اونودوم ... گورمه دين نئجه باخيردي ..نه حسرتله بيزه يالواريردي كي گئده ك آماندا قالاق .
وزير : آي يازيق بيلسيدين كي خديجه كيمي سئوير اونداكنديني سارايدا اودا چكردين .
قاضي : كيمي سئوير ....سويله گوروم ...او يالنيز خليفه نين سارايندا بير نديمه دير ...خليفه ده اونا ياخينلاشمايير ...او يالنيز مني ....گره ك مني سئوه ...
وزير : گره ك ...آي يازيق بورانين هر خبري منيم يانيمدادير ...بوش يئره وزير اولماميشام كي ..سارايين ايچ ديشيندن خبريم وار ...خليفه نين سير يولداشيام .
قاضي : (وزيرين ياخاسيندان ياپيشير) سن يالان دئييرسن . ايستيرسن من اوندان اوزاخلاشام ، سن منه دوست سان يوخسا دوشمن ؟آخي بوتون ايشلرده بير اولوب بير ايشليرديك .نئجه اولار سن مني خليفه يه ساتاسان ؟
وزير : دوستوم من سني ايستيرم و اونا خاطير خديجه دن اوزاقلاشماغيني صلاح گورورم ....اونون بير باشي وار مين سئوداسي ...بيرينجي سي اونو خليفه نين سارايندان چيخارتماق ان چتين ايشدير ،ايكينجي سي اونون گره ك سنه گويلو اولا كي هئچ ظن ائتميرم .
قاضي : مني آلداتمااومني سئومليدير،من بوخليفه نين بويوك قاضي سييام.سارايين بويوك شخصيتلريندنم كي خليفه منه اينانير ..او مندن باشقا كيمي سئوه بيلر ؟
وزير : اوبير گئنج قيزدير اولا بيلير كي سندن باشقالاريلادا سئويشسين ، من سارايدا كيمسه يي گورمه ميشم
قاضي : سارايدان اوزاق هر كيم اولورسا اولسون دوستاقا سالارام ، اؤلدوررم ،اونا عشقين ايضاح ائدني محو ائلرم ..خديجخ يالنيز منيم دير آغيللييام ،پوللويام ،دولتلييم .قدرتيم وار...
وزير : او بونلاردان قاچير بلكه دلي ، آغيلسيز ،پولسوز سئوير
قاضي : آبدالدير ....يوخ او آغيللي دير بئله ايش گورمز مندن باشقا كيمسه ني سئومه يه حاققي يوخدور .
وزير : عشق .حاق . ناحاق .سئومك.سئومه مك .بونلارين سن نجور بير يئره ييغدين ..بونلار بير يئره سيغارمي ؟
سويله ديلرليلي دن باشقا ،دلي مجنون ،سن
گوزللر گوروب دينله يييب هئچ مي سئويرسن ؟
دئدي:
ليلي دن آلميش بو كونول آتش عشقي
يانديريب سوندورن اولسا دلي كونلو
دييرم بيرده گلسين ده گورونسون بيزه ليلي
قاضي : يانيرام هئي مجنون تك بيلن يوخ اويله مي ؟ بس كيمدير او رقيب ؟ مني عشقيمدن اوزاق سالان .كونلومو ويران ائدن ؟سن منيم دوستوم سان ...سويله تانريا باخ مني دهشتده بوراخما. اينتظار آغاجلارينا باغلاييب آغلاتما .
وزير : نه تئز اؤزوندن گئتدين بوندان قاباق كسيب بيچيردين ....سويله گوروم بس نه اولدو ........طاقتين قالمادي؟ سويلسم قورخورام اينانميياسان ، گوله سن ، مني تحقير ائده سن ،..سويلرم يالنيز خليفه بيلمسين.
قاضي : بوراخ بو سوزلري منه اينان .هئچ بير كسه سويله مم . كونلومده باسديررام .
وزير : دلي ديوانه بهلول دير اونون سئودييي ....
قاضي : كيم ؟ دلي بهلول ؟
وزير : اونون جسارتين ،آغلين و بيليمين سئوير .
قاضي : بهلول .ديوانه بهلول . آخي اودا سئويب سئويلمك آنلارمي ؟.
وزير : اونون خالقين ايچينده حورمتي چوخدور .خليفه نين اونو محو ائتمه يه جسارتي يوخدور . اوندان قورخماق گره ك دير .
قاضي : اولا بيلمز من بونو خليفه يه دئملييم ، خليفه ني بو ايشه قارشي دورماغا ...
وزير : بوراخ .سن منه سوز وئردين .منه رحم ائله بيز دوستوق خليفه بيلسه هامي ميز محو اولاريق .اونجه دن بيزيم باشيميزي وورارر
قاضي : بس من نئيلييم .....
خديجه (گلير اونلاري گورور .و اونون داليجا بير پينه چي ايچري گيرير ):قالخين ،خليفه گلير،حرمخانه نين قادينلاريلا گوروشه جه ك .گئدين بوردان تئز اولون .
پينه چي : منده خليفه ني گورمك ايستيرم ، منه يارديم ائتمه ليدير (ياپيشير قاضي نين ايافلاريندان و اونا يالوارير ) منه يارديم ائت ،آروادم مني ائودن چيخارديب .قاضييه گئتمك ايستير قاضي ني...
وزير : قالخ سني ده قاضي ياخشي تانير ...ائله بيل سنده بو آييله ده سن .
قاضي : ال چك گوروم ، سن كيمسن ...ايشلرين هاميسي ... او بهلولدادير اونو گوروم محو اولسون .بوراخ ياخشي آختارسان آرواديني بوردا تاپارسان ....
خديجه : تئز اولون ...خليفه ..تئز اولون ..(گئدير )....
پينه چي : بوردا ...سارايدا... خليفه ...سنين اياقلارينا قوربان اولوم (وزير و قاضي چيخير)قوربان بس منيم ائويم ...من او ائوي قازانميشام ايندي آرواديم مني ائشييه آتير...ائوه قويمور ...يوخ . خليفه ده ن چيراغ يانمير .بلكه ده دوغرودان خليفه اونو سارايينا گتيريب .ائله اولسا جان قورخوسو وار ....(قاچير).
~~~~~~~ اوچونجو پرده ~~~~~~~
بيرينجي شكيل
كاروانسرادير جاماعات ييغيشيب ،كاروانسراچيلا بير نفر تاجير سوزله شيرلر
تاجير : اشي آخي نئجه بير پيشميش تويوقلا، دورد يومورتا اولور مين دينار ؟ آي جاماعات بير سيز قيضاوت ائدين بئله ايش اولارمي ؟
بيرينجي نفر : نه اولوب هاي كوي ساليبسيز ؟
ايكينجن نفر: اشي وئر پولونو هاي كوي ياتيرتدا نه باش آغيريسي وئريرسيز؟
اوچونجو نفر : اشي بير يئمه يين پولو نئدير كي ...
كاروانسراچي : آي جاماعات قولاق آسين ....بو كيشي تاجيردير ...
بيرينجي نفر : منده دئديم ديلنچي دير وئرمير ،اشي چيخارت پولو وئر ده .
كاروانسراچي: كئچن ايل گليب بوردا يئييب ايچيب پول وئرمه ميش گئديب .
ايكينجي نفر : تاجير جاماعات ائله بئله اولار ،يئمگي ياخشي ، آلماقي ياخشي پول وئرمگي چوخ زور اولار .كيشي خالقين پولونو وئرده بونا دا تاماح ساليرسان .
تاجير : بير سن نه دئييرسن ...من بونو دوز پولونو وئرمك ايستيرم آمما بو ...
كاروانسراچي :بير ايلدن سونرا منه بير تويوق ،دورد يومورتانين پولون وئرير آخي بو عدالت دير ..هه؟
بيرينجي نفر : كيشي به سن نه ايستيرسن سنين حاققين بير تويوخ ، دورد يومورتا ديردا .
اوچونجو نفر : دوغردوردا كيشي سن بوش يئره هاي كوي ساليبسان .
كاروانسراچي : آخي آي يازيقلار بس سيز بوراسيني دؤشؤنمورسؤز كي بو تويوق و يومورتالاري قالسايدي بير ايله قده ر منيم نه قده ر تويوق جوجه م ويومورتام اولاردي .؟هه؟....دؤشؤنموسؤز؟
ايكينجي نفر : دوغرو دئيير دا اشي سندن آرتيق ايسته مير كي بير ايلين تويوق يومورتاسيني ايستير ...سن وئرمليسن ..(گئدير)
بيرينجي نفر : حاخلي دير .هاميسيني قايتارماليسان
اوچونجو نفر : يازيق او حاقيني ايستيرده وئر مين ديناري قوي قال ياتسين .
تاجير : آي مسلمانلار بو نئجه حاقدير كي من باش قورتارا بيلميرم بو مملكتده بير شخص يوخدور عدالتله بو ايشه سون قويا ؟
اوچونجو نفر :ائله ايسه سن قاضيني گورمه ليسن ، اوداكي حاققين آليب سنين ايشينه باخار .
تاجير : نئجه كي حاققين آلار ،من قاضي گتيررم منيم حاققيمي آلا وئره و دوزقيضاوت ائيليه ...دايانين من قاضي گوروم .(گئدير )
كاروانسراچي : هر يئره كئتسن من حاقلي يام پولومو وئرمه ليسن .(هامي سوزونو تصديق ائديرلر).
ايكينجي شكيل
بهلول كوچه ده گئدير .بير پينه چي كوچه باشيندا اوتوروب . بهلولون الينده بير كيسه . قوجانين يانينا يئتيرير و قوجا اونا باخير .
بهلول : آي كيشي بس سن گئجه ني آغاجدا ياتيبسان ؟قارقا كيمي نه تئزدن اويانيبسان ؟
قوجا : منيم آتام وصيت ائلييب كي گون جيخاندا ائودن چيخ گون باتاندا ائوه قاييت .
بهلول : چوخ ياخشي بس ياخشي ائولادسان آتانا....بو خرابه ده ن اوزاقدا اوتور ..بوردا يشين اولماسين .. (بهلول خارابانين ايچينه گيرير و قوجا اونو گيزلينجه سوزور ،بير كيشي كوچه باشيندان گورونور قوجا اونو گتيريب اوز يئرينده اوتوردور : عمي جان بوردا اوتور من بير ال سووا يئتيرم گليم .سن بوردان گوز قولاق اول.بهلول چيخير .قوجا گيرير ايچري و بير آزدان سونرا بير پول كيسه سيله چيخير و سئوينج حالدا گئدير .صحنه قارالير.
اوچونجو شكيل
بهلولون ائوي بير ساده ائودير .قاپي دويولور بهلول قاپيني آجير همان قاديندير كي بيرنجي پرده ده خليفه يه شيكايت ائدير دي ....
قادين : بهلول آماندير كومك ائله قاضي منيم سكه لريمي ييب قايتارمير ، باش اوسته تانري ،آشاغيدا گومانيم سنه گلير .
بهلول : نئجه ، نجور سنين سكه لرين قاضي الينه دوشوبدور ؟
قادين:بير كوپه قيزيل سكه م واريدي اريم ائولدن سورا قالميشدي ، ائويمي اونلا ياخشي دولانديريرديم ...اوغورواردان قورخودوم ...اؤزون بيليرسن كي بير دول آروادام بو شهرده تانريدان باشقا بير كيمسه م يوخدو ....بير امين آدام آختاريرديم ، قاضي ياديما دوشدو .آپاريب سكه لري اونون يانيندا امانت قويدوم ..
بهلول : ديلسيز آغيزسيز سيكه لري ، سن گور كيمه تاپشيريبسان ؟...آي يازيق او ايتي قويروغويلا يئيير ....بو سورويه ائله هارون الرشيد كيمي چوبان لازيمدير ، كندلرينه لايق چوبان تاپيبلار .
قادين : صاباحكي گون كي گئتديم سيكه لردن آليم ، قاضي منه بير كوپه بال وئردي .آخي من سيكه وئرميشديم يوخسا بال ؟
بهلول : سنين سيكه لرين بال اولموشدو اويله مي ؟....اشي نه قده ر دانيشيرسان .اؤزونو داغا داشا وورورسان . دلي اولوب آغزينا گلني بو حاكمييتين دانلاماسيندا قابيرغاسينا وورورسان ، يئنه ده بو خالق آييلمير كي آييلمير .آخي من بيلميرم قاضي نه دير ؟...خالق يارديمجي سي ، عدالت قوران يا عدالت پوزان ؟آخي بيز اونلاردان عدالت اوموروق نه خيانت ،ظولم ،قولدورلوق و اوغرولوق .
قادين : دوغرودور ...ايندي من نئيلييم ،اؤزوم و اوشاقلاريم آج ،سوسوز قالميشيق .......
بهلول : عيبي يوخدور .سن گئت ائوينه من آخشام سنه نئچه سكه امانت وئره رم .اوچ گوندن سورا من خليفه ساراييندااولاجاغام ، قاضيده اوردادير ،شكايتي گتير اورا .
(قادين سئوينج حالدا چيخا چيخا ):تانريدان سورا اومودوموز سنه دير بهلول .
(بهلول قاييدير صانديقين اوستونده اوتورور و اؤز اؤزونه ):آي ديوانه بهلول سن دلي سن يا سني دلي ائله ماق ايستيرلر .ائله معلومدور كي خالقين كوتو احوالاتي سني دلي ائله ماقا ساري آپارير ....قدريني خليفه يالنيز ،وزيرين ،قاضينين اؤزونو دانلاماقدا بيلير ...حرمخانه نين قادينلارينين يانيندا كنديسيني گوسترمكده و مني دلي فورموندا اله سالماقدا ...آي دلي ديوانه ، هر نه يه اولوبسان بويوك بهانه .تاپيليرسان ، ايتيرسن ، قاضي اولورسان ، خليفه اولورسان .ضابيط اولورسان ،عاشيق اولورسان .هاميسي يالنيز دلي پالتاريندا ...من دليه عاشيقليق نه ياراشير ...اودا كيمه ؟ خديجه يه ...والله خديجه گوزلدير .جاواندير آغيللي دير ...حرمخانه ....يوخ او حرمخانه قيزي دئييل او گوزل پري دير اونا بير جاوان گوزل آغيللي اوغلان لازيمدير ...من اونا لايق دئييلم ....من قوجايام ،دلييم ، آخي نه ييم وار ،دايم خالق ايچينده گولونج بير آدام ،خليفه .وزير . قاضي يانيندا بير دلي دوشمن.خالق ايچينده بيلمم حاقلي لارا دوست ، حاقسيزلارا دوشمن.(قاپي دويولور.بهلول قاپيني آچير .كاروانسراچيداكي تاجير داخيل اولورلار )
تاجير : آماندير بهلول دي.... بهلول ....
بهلول : ديوانه بهلول .ده قورخما .بو ديوانه يه نه سوزون وار ؟ايره لي گل ديوانه دن قورخما .
تاجير : من ديوانه يم من دلييم بير ايلدن سورا گلميشم كاروانسراچينين پولونو وئرم ...من هارا بورا هارا ..بير ايلدن سورا ...
بهلول : نه اويون گليب باشينا بو اويونباز مملكتده ....ساغلام ميلتين ساغ حاكيمي اولار اما يازيقلار اولسون بيزه كي قورويا بيلميريق كنديميزي . هار حيوانلار كيمي بير بيريميزه آغيز آتيريق .حاكيمه قويروق بولاييريق .آياق آتدا سوروننلر اوستونده سارايدا شادليق ساليريق و كنديميزي اويونجاق ائديب اونلاري گولدوروروق ....والله بو كوتو دورومدان دلي اولمويان آغيلسيزدير .
تاجير : بهلول منه زور دييللر كئچن ايل من كاروانسارادا بير شام يئميشم مندن مين دينار ايستيرلر .
بهلول: اوچ گوندن سورا خليفه نين سارايينا گلين . قاضي اوردادير شكايتيزي حل ائده ر .
________________ دوردونجو شكيل _____________
(بهلول خرابه ده بير يئري قازير بيردن بوش كيسه چيخير .كيسه الينده چيخيب قوجايا باخا قوجاني گورمور. قوجانين اوخوماخ سسي گلير بهلول سسه ساري ):نه اوخويورسان آ كيشي ائله قويروغونلا آشيق اويناديرسان
قوجا (صحنه داخيل اولارق):اللاها شوكور آرواد مني ائوه قويدو .باريشديق (اوخويور )
بهلول : آي عمي منيم بير قده ر پولوم وار .
قوجا : هاردادير اوغلوم ..ياخشي يئره قويموسان ؟
بهلول : بيلميرم قويموشام .حيتيمده گيزله تميشم ؛ايكي يوز دينار . يوز ده نه ده خليفه نين باغچاسيندا گيزلتميشم ايكي يوز اللي سيني ده بو خارابادا گيزلتميشم .من دئييرم هاميسيني ييغيم قويوم بير يئره نئجه دير گتيره م قويام ائله بو خارابايا .اوندا اولار بئش يوز اللي .ياخشيدير ؟
قوجا : اوغلوم هارا قويوبسان دقيق گئت يئرلريني يوخلا .
بهلول : يوخلاسام ياخشي اولار ...آمما قوجا من گئديم ائله الاريدا گتيريم بوردا كيلارين يانيندا گيزلديم .هم ياخيندير . هم گوزومون قاباغيندادير . قوي من گئديم .
قوجا : ياخشي اولدو ...آي سكه لر جان سكه لر من سيزه قوربان اولوم
گتير بهلول سكه لري ، من آختاريم ، من بؤلؤم
سكه لري آپارديم ائوه آرواد قاپيني باغلاميشدي .قاپيني چالديم .آرواد حيرسله : كيمدير ؟ ينه سن تاپيلدين كور بايتار؟ نه ايستيرسن ؟ ال چك .آخي سندن ده آدام ياشييار ؟هئچ سنله آدام يئمك اوچون بير قابا ال اوزادارمي ؟قوجا كافتار .توكو توكولموش تولكو .ايلان كيمي ايلده اون سيرا قابيق وئريرسن آخي سنله ياشاماق اولارمي ؟.....آي دونيا ..يوخ آي پارا پول .....زنگينليك ..قاپي داليندان سيكه ني سيلكه لديم .آي يازيق بهلول سكه لري دار گونونه ساخلاميشدي . ..آخي منيمده دار گونومويدو آرواد مني بينميردي .مني ائوه قويموردو ........سكه لرين سسي ائشيديلن كيمي قاپي آچيلدي ...قوجا كافتار ، توكو توكولموش تولكو آصلان اولدو ...آرواد مني بير كيشي كيمي قبول ائتدي .......سكه لرين سسي حيات سسي دير .......آخي آتالاريميز دئييب لر كيشنين جئبينين پولونو دييرلر اونا آدام حساب ائدرلر ............واي من او سكه لري اوردان گوتوردو بهلول گئديب اونلاري اوردا گورمسه اوبيري سكه لري اورا قويماز ياخشي سي بودور كي گئديم سكه لري آرواددان آليم گتيريم قويوم اورا سونرا هامسيني بير يئرده گوتوررم آروادي لاپ ياخشي سئوينديررم اوندا آرواددا منه ياخشي باخار ،پاپاغيمين حورمتيني ساخلار ، مني بوراخيب باشقاسينا كونول باغلاماز.هه تئز گئديم سكه لري گتيريم
_______________بئشينجي شكيل _________________
بهلول كيسه الينده قوجانين قاپيسيندان كئچر كن ار،آروادين هاي كوي سسيني ائشيدير .رد اولان زامان قوجا و آرديجا پاپاغي صحنه يه آتيلير آروادقاپي قاباغيندا:من بيليرديم سنده او كيشيليك يوخ عاييله ساخلاماغا . سكه لري گتيريب منه گوستردين بيرده اليمدن آليب ييه سينه قايتاردين .
قوجا : آرواد اينان من دئييرديم چوخالار .چوخ ايستمك بيزي آز يئمكدن ده قويدو .
آرواد : ائوله سن ده بوردا دا سنين يئرين يوخدو يئري جهنم اول قوجا كافتار ، پاييز تولكوسو ، ايتيل گوزمدن .(پينه چي دوشور بهلولون داليجا و آرواد بركدن قاپي ني باغلير .صحنه قارالير .)
______________ آلتينجي شكيل ________________
بير مجلل ائودير .قاضينين ائوي دير .قاضي سكه لره اوينور .بيردن نه يادينا دوشن كيمي دوشونور . بير حزين اوخوماق سسي گلير دوروب پنجره دن ائشييه باخيب قاييدير سكه لري يئره آتيب .باشيني اللريله توتوب قاپيي قاباغيندا اوتورور .
قاضي :(سكه لره باخاركن )نييمه لازيم .خزانه م دولسون ...كونلوم سينيخ خسته دير . بوشدور ..كيمسه م يوخ منه سئوينج ئره ..نييمه لازيم سيز ...سيزين پازلاديغينيز يالنيز گوزومو قاماشديرير ...ايستميرم يالنيز سيزينله ياشاماغي .منه سئوگيله ياشاماق ان اونملي حياتدير .آمما او سارساق بهلول قويسا ...او گوزل ملكي منيم اليمدن چيخارتماسا .اخي من بيلميرم سن اونون نيينه عاشيق اولوبسان خديجه .بيلميرم خليفه يه دئييم يا يوخ .دئسم بهلولو كي اودوره بيلمز اوندا ميلت ديير خلفه نه قده ر قورخاق دير كي بير دليدن قورخوب اوني اولدوروب .آمما خديجه نين اولدورمه سي اونون الينده سو ايچيم كيمي بير شيء دير يوخ دييمم .نئجه دير اؤزوم بهلولو اولدوروم .بير دليدير دا ...آمما يوخ ...او بيزيم هاميميزدان آغيللي دير هاميميزي سريير .خليفه ني چوبان وبيزلري اونون ايتلري سانير . گوزوموزون قاباغيندا جسارت ائديب بيزلري تحقير ائدير ...بلكه خديجه اونون جسارتني سئوير ...اوندا منده ائله دانيشارام ....آمما يوخ اوندا بو گوزل پاراق سكه لر اليمدن چيخار ..قاضي اولماق منه رويا اولار (قاپي چالينير ،تله سيك سكه لري ييغيشديرير ) كيمدير ؟
بهلول : ديوانه بهلول .آچماسان آتيملا دوواردان آشاجاغام .
قاضي :ياخشي گليب .ائله يئريدير كي باشين باتيرام سسين كسه م .كيمسه نين خبري اولماز .دييريق دلي دير قاليب چولده قورد قوش يييب .(بركدن )گلديم بهلول .(بهلول داخيل اولور )
بهلول : خليفه نين محترم قاضي سي نه حالدا؟ منيم بو آتيما بير آز سو وئريرسن ؟
قاضي : اشي سن الله بوراخ آغاجداندا آت اولار ؟ آغاجدا سو اوت يير .
بهلول : منده دييرم ..ايت اليندن سوموك گميرمك اولمورمنده آلا گوزلو ،قارا قاشلي ،ياللاري اوزون اوجا بويلو آت مينيم ،او بويدا آتدان يئكه خليفه ائششه دن كيچيك قاضي ده آت مينسين. تانريا خوش گئدرمي؟
قاضي : بهلول ،خديجه ،او گوزل ملكدن نه خبر؟
بهلول : منيم سنه ايشم دوشوبدور .دلي بهلول سنين قاپينا گليب ..
قاضي : سن مني محو ائليرسن سن منيم حياتيمي بو ساراييمي باشيما اوچوردورسان .او گوزل ملكي مندن اوزاق ساليرسان .
بهلول : كيشي بير دايان گوروم من دليم يوخسا سن ؟ نه اؤزوندن چيخيرسان .او نه منه ياراشير .نه سنه .نه ده خليفه نين....
قاضي : منيم نييم يوخدور مني سئومسين سني سئوسين ؟
بهلول : بيز هاميميز دليييق .من،سن،خليفه...خليفه نين سارايي بير بويوك دلي خانادير . من جان قوروماق دليسيم ، سن يالتاقليق دلي سي و خليفه ده قدرت دلي سي .يازيق خديجه نئجه سئچسين بير طرفده سارايين شكوه و عظمتيني ، قاضي نين ابهتي ني بير طرفده ده كي يئر سيزيوردسيز دلي بهلولو.
قاضي : سن منيده محو ائديرسن اؤزونوده ،ال چك. سارايا اياق قويما قوي اودا اونودسون .
بهلول : اودا دلي دير . دلي اولماسايدي يا او دلي خانادان قاچاردي يا كنديسيني محو ائدردي .، آمما ائله باخيرام او اؤزونو محو ائدير هر گون سنين ،وزيرين ،خليفه نين يويولماميش اوزونو گورور .
قاضي : بهلول ال چك سارايدان . دئدين ايشين دوشوب منه اويله مي ؟
بهلول : دوغرودور ، قاضي اولماق ايستيرم .
قاضي : نئجه سن جسارت ائديرسن قاضي اولماق سوزونو منيم قارشيمدا ديله گتيريرسن ؟
بهلول : قورد آتيلماسين باشينا،دئميرم كي قاضي اولوم ...ائله بيل جين وورموش آداملارا اوخشاييرسان .. كيمسه سنين يئريني توتماق ايستمير كي بئله اؤزوندن چيخرسان . منه يالنيز قاضيليق درسي وئر .
قاضي : اوندا سن منه نه وئررسن ؟
بهلول: منيم نييم وار آي يازيق فاغير مسكين بير آدامام..دئيير سن كفن پولو من وئريم ؟
قاضي : اؤزون اؤله سن ...من سنه درس وئريم باشيما بلا آچاسان ؟
بهلول : بس اوندا خديجه ...
قاضي : كس سسيني اونون آديني چكمه .آغزيني آچاندا ائله بيل آري يوواسينا چوپ اوزاديرسان آري كيمي آدامي چاليرسان .سنين ديلين ايلان كيمي دير ...
بهلول ك بس ائله سه گل معامله ائده ك ائشيدميشم ايكي دنه اوغلون وار هه، ائله دير مي ؟
قاضي : هه ..اونلارلا سنين نه كسب و كارين ؟
بهلول : هئچ .سن منه قاضيليق درسي وئر ،منده سنين اوغلانلارينا مكتبده درس وئريم . بوندان اونملي خديجه ده ن ال چكيم .
قاضي : راضييام .آمما دوغرودان خديجه دن ال چكيرسن يوخسا...
بهلول :سوز وئرديم ...من ازلدن اوندان ايشيم يوخدو يالنيز او .....
قاضي : يالنيز او منيمدي ....حاضيرام ...
بهلول : بيليرسن خليفه بيلسه .....
قاضي : سوز وئر كي خليفه يه ده دئمييسن .
بهلول : هه ..هه ياخشي اولار ..آخشانم اوشاقلاري يوللا گلسين .بيرده او كوينه يي وئر منه پالتاريم يوخدو .(پالتاري آلير .گئدير )
قاضي : ان اعلا .داها بوندان ياخشي اولماز ..بهلول خديجه ال چكسه .هم خديجه منيم اولار . هم سكه لر خديجه سيز سكه نييمه لازم يا سكه سيزخديجه .هه بئله ياخشيدير
___________________ يئدينجي شكيل ____________________
كوچه ديربهلول يالنيز كوچه ده بير قاپي آغزيندا دوروب قاپيني چالير .قاپي آچيلير بير هيكلي كيشي چيخير:به ،بيزيم ديوانه بهلولوموز .اشي سفه ليكده ال گوتوروبسن يا يوخ ؟
بهلول : بو دونيادا يا گره ك عاشيق اولاسان يا دلي ...البته بولارين ايكيسيده بيردير ....بوراخ . مه ايكي دنه آيي بالاسي لازيمدير. وارمي؟
كيشي : هه .تزه گتيرميشم .ننه لريني اؤلدوردوم اؤزلريني گتديم .آمما بهلول بليرسنده....
بهلول : هه بيليرم .اون دنه گورر يوخسا گئديم ...
كيشي : اشي هارا گئده سن .؟دلي بهلول گله قاپيما من اونو الي بوش يولا سالام .يوخ ...گل ايچري گوتور آپار .(گيريرلر ايچري . صحنه قارالير .يالنيز قارانليقدا بهلولنان كيشينين سسي ائشيديلير .)
كيشي : بهلول حيوانلارلا ياشاماق ، اينسانلارلا ياشاماقدان . سن كي هر گون سارايداسان.
بهلول : ائله اوردا حيوانلارلا باش باشا سورتورم .بونلاري دا آپاريرام سارايا ده ده لرينين يانينا بير قاضي دوزلديم كي آييلار اونو آتالاري كيمي يالاسينلار .بو كوينه يي ده آدامجيقينا گئديريم .
------------------------------- سككيزينجي شكيل ------------------------------------------
قاضي ايله آروادي قاپي آغزيندا ايضطراب ايچينده ساغا سولا گئديرلر.
قاضي : گوره سن نييه گئجيكديلر ؟اوغلاني يوللاديم داللاريجا اودا گئجيكدي .
آرواد:من اوشاقلاري سندن ايستيرم . هرادا اولسا گتيرمليسن .
قاضي : ياخشي ياخشي بير دايان گوروم ايندي گلرلر .
آرواد :اوغلان گلير آمما اوشاقلاردان خبر يوخدور ....اولميا ...آمان الله ....من اوشاقلاريمي سندن ايستيرم.
قاضي (اوغلانا ):هه نه اولدو ؟ اوشاقلار هاني ؟ قالديلار بهلولون يانيندا.؟
اوغلان : يوخ جانيم اوردا دئييلديلر بهلولدان سوروشدوم هاني بس اوشاقلار ؟ دئدي نه اوشاقي؟
قاضي : نئجه نه اوشاقي ؟...
آرواد :بس منيم اوغلانلاريم ..هاني اي شهرين خليفه سينين قدرتلي قاضيسي ..سن اوز عاييله قورويا بيلميرسن اوندا قالميش خالقين حاققيني قورويوب عدالت قوراسان ؟...
قاضي :سن دانيشما كئچ ايچري سسيني خالق ائشيتمه سين .
آرواد :'گئده رم آمما اوشاقلاريمي سنين دريندندن ده چيخاتمالي اولسام چيخاردارام .
اوغلان : قوربان بهلول اوغلانلاريندان بير سوز دئدي قورخورام دييم (ياواشجا.آروادا اشاره ايله )هه دئييردي كي قاضي نين اوغلانلاري دونوب آيي اولوب ...
قاضي :آيي ..ياخشي سنه گوستررم ديوانه بهلول من سنين اليندن خليفه يه شيكايت ائده رم (غضبله گئدير)
________________ دوردونجو پرده ___________________
(هارون الرشيدين ساراييدير ..خليفه ،وزير ،خديجه ،قاضي ..و بهلول آغاج آتيلا دور وورور دايانير )
بهلول : اميرالمومنين مني بو دلي خانايا يولداشلاريمين يانينا چاغيريب ...قاضييا امر ائله يين منيم آتيمي بو طوله ده ساخلاسين ، اوبند ده (خليفه نين تختيني گوسترير) باغلاسين .
خليفه : (وزيره باخير گولورلر) بهلول ؛ بيليرسن دنيزين ان بويوك حيواني نه دير ؟
بهلول : نهنگ .
خليفه : اوندا بس قورولوغون ان بويوك حيواني نه دير ؟
بهلول : استغفرالله . هانسي حيوانين جراْتي اولا بيلر كي اؤزونو خليفه دن بويوك بيله ؟(هامي گولورلر .خليفه باشين قوزويان كيمي سسلرين كسيرلر)
وزير : بهلول ، بير او پالتاريني يودا نه اولار؟
بهلول : يئنه چيركلي اولاجاقدا .
وزير : يئنه ده يووارساندا .
بهلول : منيم ان اونملي ايشلريم وار پالتاريوماقا دونيايا گلمه ميشم كي .
خليفه : بهلول ع رنگين چوخ ساراليبدير ، يقين آجسان ...منيم يئمكلريمدن گتيرين بهلول يئسين .
(يئمك گتيريرلر .بهلول گوتوروب گئدير ائشييه . الي بوش قاييدير )
قاضي : سن او قده ر آجييدين تز يئدين ؟
بهلول : يوخ ، قويدوم ايت يئسين .
وزير: خليفه نين يئمه ييني قويدون ايت يئسين ؟
بهلول : ياواش ده ايت ائشيدر او يئمك خليفه نيندير، يئمز .(هامي گولور )
خليفه : بهلول ، ايستيرسن خليفه اولاسان ؟
بهلول :يوخ .
خليفه : يالان دئييرسن . نييه ايستميرسن؟
بهلول : من ياشاييرام .اوز گوزومله اوچ خليفه نين اؤلمه ييني گورموشم . سن كي خليفه سن نئچه بهلول اؤلومون گوروبسن ؟(قاضييه ) قاضي نه يئييبسن توكولوب ساققالينا ؟
قاضي : گوورچين...
بهلول : گورورم فضله سي توكولوب ساققالا.(هامي گولور . قاضي عصبلشير )
قاضي : قوربان ؛ بهلول منيم اوشاقلاريمي گيزله ديب وئرمير .
بهلول : دوغرودور قوربان ، قاضي نين اوشاقلاري منيم يانيمدا درس اوخوردولار .آمما دونوب آيي اولدولار.
وزير : آيي؟
خديجه : نئجه آيي ؟اينسانداندا آيي اولارمي ؟( بو حالدا سكه لري يئييلميش قادين ايچري گيرير )
بهلول : نييه اولماز. بودو ها بو قاديندان سوروشون گورون قاضي نئجه اونون سكه لريني بال ائله دي ؟ بو اينسانلارين اليندن ، آدام قاچيب آيي اولار.
خليفه : بو سوزونو ايثبات ائده بيلرسن ؟ يوخسا اؤرونو دلي ليقه ووروب سوسهلنيرسن ؟
بهلول : اذن وئرين . اوغلانلاري گتيرميشم قاپيدادير..دايانين ...(بهلول چيخير ايكي آيييلا ايچري گيرير آييلارقاضي ني يالاماغا باشلاييرلار)
وزير :تانريم باشيميزا نه بلالر گلير ،اينسانداندا آيي اولارمي.
بهلول : هه اولار ..سكه لر بال اولان يئرده آدام دا آيي اولار .ياخشي آيدين گوزوز اولسا بيز ايندي بير اورمانداييق حيوانلارين هاميسيني گوره بيلرسيز .
قاضي : قوربان بو آروادين سكه لري منيم ائويمده دير او سهو ائليب بال كوپه سنين يانيندان سكه كوپه سيني گوتورميب من يولاييم اوغلان گتيرسين اما منيم اولانلاريمي ....
بهلول : سكه لر گلني كيمي اغلانلارين حاضير دير گور نه گناه ائتميشدين اوغلانلارين آيي اولدو
تاجر : قوربان من كچن ايل گليب بو كيشي نين كاروانسراسيندا بير بريان تويوخ و دورد يومورتا يئميشم .كاروانيميز حركت ائديب .بونو تاپيب پولونو وئره بيلمه ديم ايندي گلميشم حاققيني وئرم مندن مين دينار ايستير سيز قضاوت ائدين .
كاروانسراچي:دوغرودور يا اميالمونين .آمما منيم بير ايل تويوغوم دوغوب يومورتالارينين اوستونده ياتسايدي .اولار جوجه اولوب و من اولاري ساتسايديم ايندي منيم مين دناريم واريدي ..افسوس كي بو كيشي منيم پولومو ساخلاييب و من زيان گورموشم .
هارون الرشيد : بو كيشي حاقليدير .اونون مين ديناريني قايتار .
بهلول : بير دايانين .منيم بير يئريم واردي .بوگون خليفه نين سارايينا گلنده ايكي نفر فهله اورادا ايشليرديلر دئديم يولومون اوستوندهدير قوي بو پيشميش بوغدالاري وئريم اكسينلر .
(هامي گولور ):آخي پيشميش بوغدادا گووه ررمي ؟
بهلول : بير شهرده كي پيشميش تويوق يومورتويا وپيشميش يومورتا جوجه اولا پيشميش بوغدادا گووه رر .
خليفه : تاجير سن بير تويوق و 4 يومورتانين پولونو وئر . گئدين .
بهلول : گورورسوز نه وحشي اورماندا ياشييريق . اينسانلار آيي اولور .سكه لر بال اولور . آغيللي لار دلي اولور سارايدادا هر هانسي حيواني ايستسن تاپا بيلرسن .
«««««««« سون »»»»»»»»»